70 hobmo gedenkt, isch jo no weit weck. Obo iaz hobmos geglab, weil da Jüngschte von ins 51er hot iaz a in 7 als neue Vorwohl. Mir hobm net gemiat long nochdenkn,wia, wo und wenn kemm mir wohin,es wor gonz klor, da Ploseberg wor inser Ziel. Mit do Soalbohn aui, geat holt a Stuck leichter. Do Aperitivo ban Schlemmer hot ins gelod gor awian schnell innekemm. Weil mir jo nimmer die Jüngschtn sein, hot ins die Soalbohn bis zur Pfonnspitzhitte auigfiahrt. Is Wetter hot ins awian mies mitgschpielt, ober sell wor ins Wurscht! Die Stimmung, die guate Laune und is guate Essn ban Ossi hot ins decht die Sunne ins Gsicht gezaubert. Ohne an guatn Karterle und an gemiatlichen Ratscherle wars ba ins 51er vom Ploseberg eh net ougongen. Die Käsesahnetorte von Ossi wor no is I-Tipftl, ohne da sem warn mir a gor net hoamgong.Ausklingen hobm mir den Tog ban Plosestodl lossn. A guate Pizza und a Glasl Wein, wos will man mehr, es wor oanfoch lei fein. Mit oan Tog sein mir 51er jo net zufriedn, deswegn hobm mir gewortet bis is Wetter holt decht no angaling schianer wortn isch. Ba strahlendem Sunnenschein und an herrlichn Herbstog hobm mir ins no a gselliges Törggelen ban Erschbamer in Spingers gegönnt. Is Essn wor super, der Wein genial und die Stimmung wieder amol Bombe. Da Vampi Hons von Ofers hot ins mit sein Örgele so richtig pärig augschpielt. Und so hobm mir den Tog guat ausklingen lossn. Guat gelaunt hobm mir beschlossn, dass mir is negschte Johr des genauso wieder mochn welln. //// red